دہلی: جشن یوم جمہوریہ تمام دیش واسیوں کو مبارک ہو. یہ وطن عزیز کے عظیم آئین کے تحفظ، دیرینہ اخوت و بھائی چارہ کی بقا، امن وسلامتی کے قیام اور ملک و ملت اور انسانیت کی تعمیر و ترقی کے لیے تجدید عہد کا دن ہے۔ آئین کی پاسداری اور ملک کی تعمیر ورقی کے لیے جدوجہدتمام دیش واسیوں کا قومی فریضہ ہے۔ ان خیالات کا اظہار مولانا اصغر علی امام مہدی سلفی امیر مرکزی جمعیت اہل حدیث ہند نے کیا۔ موصوف کل 26 /جنوری 2026ء کو مرکزی جمعیت اہل حدیث ہند کے اعلی تعلیمی و تحقیقی ادارہ المعہد العالی للتخصص فی الدراسات الاسلامیہ واقع اہل حدیث کمپلیکس، جامعہ نگر ،نئی دہلی میں منعقد باوقار تقریب یوم جمہوریہ کی مناسبت سے حاضرین کو آن لائن خطاب کر رہے تھے۔
انہوں نے کہا کہ آج یوم آزادی کی مناسبت سے جو ہم جشن منا رہے ہیں اور ہم نے جس جوش و جذبہ اور عزم کے ساتھ ترنگا پرچم لہرایا ہے اور قانون کی پاسداری کرنے، دیش کی تعمیر و ترقی کے لیے تن من دھن کی بازی لگا دینے، قومی یکجہتی اور آپسی محبت وبھائی چارہ کو عام کرنے اور امن وشانتی کو بہرصورت برقرار رکھنے کا جو عزم کیا ہے اور جس طرح ہمارے بزرگوں نے بلا تفریق مذہب و مسلک مل جل کر دیش کی آزادی اور تعمیر و ترقی کے لیے بے مثال قربانیاں دی تھیں اور جس طرح سر جوڑ کا عظیم آئین بنایا تھا، اسی طرح اب ہمارا فرض ہے کہ ہم اسی عزم و حوصلے کے ساتھ آگے بڑھیں،آئین کے تقاضوں کو پورا کریں، ملک کی ایکتا اور اکھنڈتا پر حرف نہ آنے دیں، ملک میں تشدد اور منافرت کو راہ پانے نہ دیں، امن و شانتی اور روایتی اخوت و بھائی چارہ اور گنگا جمنی تہذیب و ثقافت کو فروغ دیں۔ یہ وقت کا بڑا تقاضا ہے۔
حاضرین کو خطاب کرتے ہوئے مرکزی جمعیت اہل حدیث ہند کے میڈیا کوآرڈینیٹر ڈاکٹر محمد شیث ادریس تیمی نے کہا کہ یہ ہمارے لیے بڑی مسرت اور سعادت کی بات ہے کہ آج ہم 77واں یوم جمہوریہ منا رہے ہیں۔ جس کا ہمیں حق بھی ہے۔ کیونکہ یہ دن ہمیں بڑی جانی و مالی قربانیوں کے بعد حاصل ہوا ہے۔ ہمارے بزرگوں خصوصا علماء اہل حدیث نے دیش کی آزادی اور تعمیر و ترقی کے لیے بے مثال قربانیاں پیش کیں اور ہمارے رہنمائوں نے عظیم آئین بنایا جس میں ہر شخص کو رائے و ضمیر کی آزادی ،پر امن و خوشگوار زندگی اور بلا تفریق تمام شہری کے لیے یکساں مواقع کو یقینی بنایا گیاتھا ،ہمارا عہد ہے کہ ہم آئین کی حفاظت کرتے رہیں کے اور قومی اتحادو یکجہتی پرآنچ آنے نہیں دیں گے۔
اس موقع پر المعہد العالی کے استاد مولانا عبدالغنی مدنی ،معروف سرجن ڈاکٹر محمد اسعد، مولانا محمد رئیس فیضی، ڈاکٹر عبدالواسع تیمی اور جناب ڈاکٹر سید عبدالرؤف وغیرہ شخصیات نے بھی اظہار خیال کیا۔
حسب سابق سب سے پہلے قومی پرچم کشائی کی گئی، پھردیش گان جن گن من اور ترانہ ہندی سارے جہاں سے اچھا ہندوستان ہمارا گایا گیا اور حاضرین کے مابین شیرنی تقسیم کی گئی۔ اس تقریب میں المعہد العالی للتخصص فی الدراسات الاسلامیہ کے موقر اساتذہ، طلبہ، ملازمین اور مرکزی جمعیت اہل حدیث ہند کے کارکنان ووابستگان کے علاوہ اہل حدیث کمپلیکس کے پڑوسی حضرات بھی موجود تھے،ان میں ایازتقی،انور عبد القیوم ،محمد عرفان وغیرہ قابل ذکر ہیں۔
آئین کی پاسداری اور ملک کی تعمیر وترقی کے لیے جدوجہد سبکا فریضہ ہے/ مولانااصغر علی امام مہدی سلفی
