مفتی یحییٰ معین
پہلی قسط میں یہ واضح ہوچکا ہے کہ ڈراپ شپنگ کا اصل مسئلہ آن لائن تجارت یا سامان کی براہِ راست ترسیل نہیں، بلکہ اس عقد کی حقیقت ہے جس کے ذریعے خریدار اور تاجر کے درمیان معاملہ قائم ہوتا ہے۔ اسی بنیاد پر اب سوال یہ ہے کہ اگر رائج ’’پہلے فروخت، بعد میں خریداری‘‘ کی صورت میں شرعی اشکال پیدا ہوتا ہے تو ایک آن لائن تاجر اپنی تجارت کو کس طرح ایسے طریقے پر قائم کرسکتا ہے جس میں ملکیت، قبضہ، ذمہ داری اور خریدار کے حق کی حفاظت برقرار رہے۔ اس سلسلے میں بیعِ سلم ایک اہم صورت ہے، لیکن اسے سمجھنے کے لیے عام خرید و فروخت سے اس کا فرق ذہن میں رکھنا ضروری ہے۔ عام بیع میں فروخت ہونے والی چیز عموماً عقد کے وقت بائع کی ملکیت میں ہوتی ہے، جبکہ بیعِ سلم میں خریدار قیمت پیشگی ادا کرتا ہے اور فروخت کنندہ اپنے ذمہ ایسے سامان کی فراہمی قبول کرتا ہے جس کے اوصاف پہلے سے متعین ہوں۔ اس میں کسی مخصوص موجود یونٹ کی بیع نہیں ہوتی بلکہ متعین اوصاف والا سامان فروخت کنندہ کے ذمہ لازم ہوتا ہے۔ مثلاً اگر ایک آن لائن اسٹور معیاری ہیڈفون پیش کرتا ہے تو اسے کسی خاص دکان یا گودام میں پڑے ہوئے مخصوص ہیڈفون کو فروخت کرنے کے بجائے اس کے ماڈل، کمپنی، رنگ، معیار، آواز کی خصوصیات اور دیگر ضروری اوصاف واضح کرنے ہوں گے، تاکہ خریدار کے لیے یہ بات معلوم ہو کہ اسے کس معیار کی چیز ملنی ہے۔ خریدار، یعنی رب السلم، قیمت پیشگی ادا کرے گا، جبکہ فروخت کنندہ، یعنی المسلم الیہ، اس سامان کو اپنے ذمہ لے گا۔ بعد میں فراہم کیے جانے والے سامان کو المسلم فیہ کہا جاتا ہے، اس کی قیمت کو رأس مال السلم اور فراہمی کی مقررہ مدت کو اجل السلم کہا جاتا ہے۔ اس طرح سلم میں سامان کا حق فروخت کنندہ کے ذمہ ایک متعین وصف والی چیز کے طور پر قائم ہوتا ہے، نہ کہ کسی خاص موجود یونٹ سے وابستہ رہتا ہے۔ یہی وجہ ہے کہ اگر تاجر کسی ایسے سامان کی پیشگی بیع کرنا چاہتا ہے جو اس وقت اس کے پاس موجود نہیں، تو اسے محض یہ دیکھ کر اطمینان نہیں کرنا چاہیے کہ ’’سامان ہمارے پاس نہیں، لیکن سپلائر کے پاس موجود ہے‘‘۔ اصل سوال یہ ہوگا کہ کیا معاملہ حقیقتاً سلم کے شرائط کے مطابق قائم ہوا ہے یا عام بیع کی شکل میں غیر مملوک سامان فروخت کردیا گیا ہے۔ اسی طرح ’’پری آرڈر‘‘، ’’جلد پہنچے گا‘‘ یا ’’متوقع ترسیل‘‘ جیسی تجارتی اصطلاحات بذاتِ خود کسی عقد کو سلم نہیں بناتیں۔ شرعی حیثیت نام سے نہیں بلکہ عقد کی حقیقت اور اس کی شرائط سے متعین ہوگی۔ بیعِ سلم کی اجازت اسی لیے ایک خاص شرعی نظم کے ساتھ آئی ہے کہ خریدار کو مستقبل میں ملنے والے سامان کا حق واضح ہو اور فروخت کنندہ پر بھی اس کی ذمہ داری متعین رہے۔ اس لیے آن لائن تجارت میں سلم کا استعمال ممکن سمجھا جائے تو اسے ایک باقاعدہ شرعی عقد کی حیثیت سے اختیار کرنا ہوگا، محض رائج ڈراپ شپنگ کے طریقے پر نیا نام چسپاں کرکے نہیں۔
بیعِ سلم کو آن لائن تجارت میں نافذ کرنے کے لیے اس کی شرائط کا عملی لحاظ بنیادی اہمیت رکھتا ہے۔ سب سے پہلی شرط یہ ہے کہ قیمت عقد کے وقت پوری ادا کی جائے اور حقیقتاً وصول بھی ہوجائے، کیونکہ صرف ادائیگی کی اجازت، جزوی رقم یا سامان ملنے کے وقت ادائیگی کو بلا تحقیق سلم کی قیمت قرار نہیں دیا جاسکتا۔ اس کے بعد سامان کے اوصاف کی ایسی تعیین ضروری ہے جس سے خریدار اور فروخت کنندہ کے درمیان بعد میں نزاع پیدا نہ ہو۔ جنس، نوع، مقدار، معیار، ماڈل، رنگ اور وہ تمام ضروری خصوصیات جن سے مطلوبہ سامان متعین ہوتا ہے، پہلے سے واضح ہونی چاہییں۔ سامان کسی مخصوص سیریل نمبر یا کسی مخصوص سپلائر کے مخصوص یونٹ کے ساتھ وابستہ نہ ہو بلکہ متعین اوصاف کے ساتھ فروخت کنندہ کے ذمہ ہو۔ اسی طرح سامان کی فراہمی کے لیے ایسی مدت مقرر ہونی چاہیے جو واضح اور قابلِ فہم ہو۔ ’’جلد‘‘، ’’چند دنوں میں‘‘ یا ’’تقریباً دو ہفتے‘‘ جیسی غیر واضح تعبیر کے بجائے مقررہ تاریخ یا ایسی متعین مدت ہونی چاہیے جس سے فریقین کے حقوق واضح رہیں۔ ضرورت کے مطابق مقامِ تسلیم بھی متعین کیا جائے، خصوصاً وہاں جہاں سامان پہنچانے کی جگہ سے اخراجات یا ذمہ داری میں فرق پڑتا ہو۔ اس پورے معاملے میں ایک بنیادی بات یہ ہے کہ خریدار کے سامنے ذمہ داری آن لائن اسٹور کی ہو۔ اگر اسٹور نے سلم کے ذریعے خریدار سے مکمل قیمت لے کر متعین اوصاف کا سامان اپنے ذمہ لیا ہے تو بعد میں یہ عذر پیش نہیں کیا جاسکتا کہ سپلائر نے سامان فراہم نہیں کیا، اس لیے اب اسٹور کی ذمہ داری ختم ہوگئی۔ سپلائر کا انتخاب، اس سے سامان حاصل کرنا اور اس کے ساتھ معاملات طے کرنا تاجر کا اپنا انتظام ہے، جبکہ خریدار کا حق اس کے اور اسٹور کے درمیان قائم ہونے والے عقد سے متعلق ہے۔ یہی وجہ ہے کہ خریدار کے ساتھ کیا گیا عقد اور سپلائر کے ساتھ کیا گیا عقد الگ الگ حیثیت رکھتے ہیں۔ اگر سپلائر ناکام ہوجاتا ہے تو اسٹور کو کسی دوسرے ذریعے سے مطلوبہ سامان فراہم کرنا ہوگا یا اپنے عقد کے مطابق خریدار کے حق کو پورا کرنا ہوگا۔ اسی اصول کی روشنی میں سپلائر کا خریدار کو براہِ راست سامان بھیجنا بھی ہر حال میں ممنوع نہیں کہا جاسکتا، لیکن اس کے لیے فریقین کی حیثیت اور ذمہ داری واضح ہونی چاہیے۔ اگر سپلائر محض آن لائن اسٹور کی طرف سے سامان پہنچانے والا وکیل ہے تو وہ براہِ راست خریدار کے پتے پر سامان پہنچا سکتا ہے، بشرطیکہ معاملے کی اصل ساخت یہی ہو اور اس میں ملکیت، ذمہ داری اور ترسیل کی حیثیت واضح رہے۔ اسی طرح اگر سامان سپلائر سے حاصل کرکے کسی مجاز گودام یا ترسیلی ادارے کے ذریعے تاجر کی طرف سے خریدار تک پہنچایا جارہا ہو تو بعض صورتوں میں حکمی قبضے کی صورت پیدا ہوسکتی ہے، لیکن صرف کورئیر کمپنی کے پاس سامان پہنچ جانا ہر معاملے میں خود بخود تاجر کا شرعی قبضہ قرار نہیں دیا جاسکتا۔ اس کے لیے یہ دیکھنا ہوگا کہ اس ادارے کو تاجر کی طرف سے کیا اختیار حاصل ہے، سامان پر کس کا تصرف ہے، ذمہ داری کس کی ہے اور وہ کس حیثیت سے سامان وصول کررہا ہے۔ اس لیے جدید ترسیلی نظام کو شرعی اصولوں سے ہم آہنگ کرنے کے لیے کاروباری معاہدوں میں ان حیثیتوں کو واضح کرنا ضروری ہے، نہ کہ صرف ویب سائٹ کے ظاہری طریقۂ کار کو تبدیل کرنا۔
بیعِ سلم کے علاوہ آن لائن تجارت کو شرعی اصولوں کے مطابق چلانے کے لیے وکالت، دلالی، سمرہ، جعالہ، وعدۂ بیع اور اپنے اسٹاک کے ذریعے ترسیل کی صورتیں بھی قابلِ توجہ ہیں۔ وکالت کی صورت نسبتاً واضح ہے۔ اگر سامان سپلائر کی ملکیت میں ہے اور اس نے آن لائن اسٹور کو اپنی طرف سے اس کی تشہیر اور فروخت کا اختیار دیا ہے تو اسٹور خود مالک یا اصل بائع بننے کے بجائے سپلائر کے وکیل کی حیثیت سے کام کرے گا۔ سامان کی بنیادی ذمہ داری اور اصل تجارتی خطرہ مالک کے ذمہ رہے گا اور اسٹور کو اس کی خدمت کے عوض پہلے سے متعین اجرت یا واضح کمیشن ملے گا۔ مثلاً ہر فروخت پر متعین رقم یا واضح تناسب مقرر کیا جاسکتا ہے۔ دلالی اور الحاقی مارکیٹنگ بھی اسی نوع کی ایک صورت ہوسکتی ہے، جہاں آن لائن پلیٹ فارم خود بیع کا فریق بننے کے بجائے خریدار کو اصل فروخت کنندہ تک پہنچاتا ہے اور اس خدمت کے بدلے متعین کمیشن لیتا ہے۔ دوسری طرف وعدۂ بیع کی صورت میں ابتدائی آرڈر کو حتمی فروخت بنانے کے بجائے محض سامان حاصل کرنے کی درخواست یا آئندہ بیع کے وعدے کی حیثیت دی جاتی ہے۔ اس کے بعد تاجر سپلائر سے سامان خریدتا ہے، اس پر حقیقی یا معتبر حکمی قبضہ حاصل کرتا ہے، اس کا خطرہ قبول کرتا ہے اور پھر خریدار کے ساتھ مستقل بیع منعقد کرتا ہے۔ یہاں ویب سائٹ کے نظام کی درست ساخت نہایت اہم ہے، کیونکہ اگر خریدار کے پہلے کلک ہی سے بیع مکمل ہوگئی اور رقم قیمت کے طور پر وصول ہوگئی تو بعد میں اسے وعدہ قرار دینا معاملے کی حقیقت نہیں بدل دے گا۔ اگر ابتدائی مرحلے میں کوئی رقم لی جاتی ہے تو اس کی شرعی حیثیت بھی واضح ہونی چاہیے، مثلاً اگر اسے ہامشِ جدیہ یا ضمانتی رقم کے طور پر رکھا جارہا ہے تو اس کے احکام، استعمال اور واپسی کی صورتیں پہلے سے متعین ہوں۔ ایک تیسری عملی صورت یہ ہے کہ تاجر پہلے سامان خرید کر اپنی ملکیت میں لے آئے اور اس کا ضمان قبول کرے، پھر اسے کسی تیسرے فریق کے گودام، تکمیلی خدمت یا ترسیلی ادارے کے ذریعے خریدار تک پہنچائے۔ اس میں تاجر کے لیے ابتدائی سرمایہ زیادہ درکار ہوسکتا ہے، لیکن ملکیت اور ذمہ داری کا معاملہ زیادہ واضح رہتا ہے۔ اس صورت میں گودام یا ترسیلی ادارہ تاجر کی طرف سے خدمت انجام دے سکتا ہے اور سامان خریدار تک براہِ راست پہنچایا جاسکتا ہے۔ یوں ڈراپ شپنگ کو شرعی اصولوں کے مطابق بنانے کا راستہ کسی ایک تکنیکی ترکیب میں نہیں بلکہ پورے کاروباری ڈھانچے کی درست تشکیل میں ہے۔ تاجر اگر مالک نہیں تو مالک کی نمائندگی کرے، اگر بائع ہے تو ملکیت اور ذمہ داری کے تقاضے پورے کرے، اگر وعدہ کررہا ہے تو وعدے کو بیع کا نام نہ دے، اور اگر سلم اختیار کررہا ہے تو اس کی تمام شرائط کی حقیقی تکمیل کرے۔ اسی طرح سپلائر اور ترسیلی ادارے کے ساتھ ہونے والے معاہدے کو خریدار کے بنیادی حق پر حاوی نہ ہونے دیا جائے۔ اس ترتیب سے جدید آن لائن تجارت کو اس کے سہل اور تیز تر ذرائع کے ساتھ برقرار رکھتے ہوئے ان شرعی اصولوں کی پابندی کی جاسکتی ہے جو تجارت میں ملکیت، قبضہ، وضاحت، ذمہ داری اور منصفانہ منافع کو بنیادی حیثیت دیتے ہیں۔ اصل مقصد تجارت کے جدید وسائل کو روکنا نہیں بلکہ اس کے اندر موجود معاملے کو اس طرح درست کرنا ہے کہ سہولت بھی باقی رہے اور شرعی ذمہ داری بھی ادا ہو۔
(مضمون نگار جید عالم دین، AAOIFI CSAA فیلو، اسلامی مالیات و کاروباری مشیر، فائنانس ایکسپرٹ اور فیملی فرسٹ گائیڈنس بمبئی کے ڈائریکٹر ہیں)
