ووٹ چوری کے خلاف آپ کا احتجاج جاری، پولیس نے ایک بار پھر بربریت کا مظاہرہ کیا
رکنِ پارلیمنٹ سنجے سنگھ، دہلی پردیش صدر سوربھ بھاردواج سمیت عام آدمی پارٹی کے کارکنوں کو پولیس نے حراست میں لیا
گیانییش کمار کا استعفیٰ، بیلٹ پیپر سے انتخابات اور الیکشن کمشنروں کا غیر جانب دارانہ انتخاب کیا جائے: سنجے سنگھ
نئی دہلی، 12 اکتوبر: ووٹ چوری کے خلاف چیف الیکشن کمشنر گیانییش کمار کے استعفے کے مطالبے کو لے کر عام آدمی پارٹی کا احتجاج جاری ہے۔ پیر کو مسلسل تیسرے دن بھی عام آدمی پارٹی کے رہنما اور کارکن جنتر منتر جانے کے لیے سڑکوں پر اترے۔ بڑی تعداد میں کارکنوں کے ساتھ آگے بڑھ رہے رکنِ پارلیمنٹ سنجے سنگھ، دہلی پردیش صدر سوربھ بھاردواج اور دیگر رہنماؤں کے ساتھ دہلی پولیس نے ایک بار پھر بربریت کا مظاہرہ کیا اور انہیں زبردستی حراست میں لے کر بس میں بٹھا دیا۔ اس دوران سنجے سنگھ نے مطالبہ کیا کہ گیانییش کمار استعفیٰ دیں اور انتخابات بیلٹ پیپر کے ذریعے کرائے جائیں۔ اس کے ساتھ ہی الیکشن کمشنروں کا انتخاب غیر جانب دارانہ طریقے سے کیا جائے۔
عام آدمی پارٹی کے راجیہ سبھا رکن سنجے سنگھ نے کہا کہ گیانییش کمار کو استعفیٰ دینا چاہیے، کیونکہ انہوں نے 13 کروڑ 37 لاکھ ووٹوں کی چوری کی ہے۔ ملک میں انتخابات بیلٹ پیپر کے ذریعے کرائے جائیں اور الیکشن کمشنروں کے انتخاب کے عمل کو غیر جانب دار بنایا جائے، جس میں حکومت کی اکثریت نہیں ہونی چاہیے۔ انہوں نے مطالبہ کیا کہ حکومت احتجاج کے لیے رام لیلا میدان فراہم کرے۔دوسری جانب عام آدمی پارٹی کے دہلی پردیش صدر سوربھ بھاردواج نے کہا کہ جب تک گیانییش کمار استعفیٰ نہیں دیتے، احتجاج جاری رہے گا۔ دہلی پولیس چاہے لاٹھیاں برسائے، سڑکوں پر گھسیٹے، کپڑے پھاڑے یا سر پھوڑ دے، لیکن ہم عدم تشدد کا راستہ اختیار کرتے ہوئے اپنے حقوق کا مطالبہ کرتے رہیں گے اور گیانییش کمار کا استعفیٰ لے کر رہیں گے۔سوربھ بھاردواج نے مزید کہا کہ جنتر منتر کو احتجاجی مقام کی حیثیت سے ڈی نوٹیفائی کرنا حکومت کی گھبراہٹ کو ظاہر کرتا ہے۔ حکومت کو لگتا ہے کہ 50 ہزار پولیس اہلکار بھی جنتر منتر کو محفوظ نہیں رکھ پا رہے ہیں، کیونکہ عوام، بچے اور لڑکیاں وہاں پہنچ رہے ہیں۔ اسی لیے حکومت اب لوگوں کو دور بھیجنا چاہتی ہے۔ کوئی بات نہیں، حکومت ہمیں رام لیلا میدان دے دے، ہم وہاں بھی احتجاج کرنے کے لیے تیار ہیں۔سوربھ بھاردواج نے سوشل میڈیا پلیٹ فارم ایکس پر احتجاج کے دوران کا اپنا ایک ویڈیو شیئر کرتے ہوئے کہا کہ دہلی پولیس نے میرا گلا گھونٹنے کی کوشش کی۔ یہ دوسری بار ہے جب دہلی پولیس نے میرا گلا گھونٹنے کی کوشش کی ہے۔ ابھیشیک کمار نے چیخ کر کہا کہ پولیس والے میرا گلا گھونٹ رہے ہیں، تو ایک پولیس اہلکار نے انہیں چہرے پر دھکا دے دیا۔ پولیس نے جان بوجھ کر مجھے گھیر لیا، تاکہ میڈیا کے کیمرے ویڈیو ریکارڈ نہ کر سکیں۔ ایل جی صاحب کو اس معاملے کی جانچ کرانی چاہیے۔دوسری جانب عام آدمی پارٹی کے سینئر رہنما گوپال رائے نے کہا کہ جہاں بھی جگہ ملے گی، وہاں تحریک اور ستیہ گرہ کیا جائے گا۔ یہ تحریک اس وقت تک جاری رہے گی، جب تک ملک میں ایس آئی آر منسوخ نہیں ہوتا، گیانییش کمار استعفیٰ نہیں دیتے اور غیر جانب دارانہ انتخابات نہیں کرائے جاتے۔
