نئی دہلی، عام آدمی پارٹی کے سینئر رہنما اور رکن پارلیمنٹ سنجے سنگھ، دہلی پردیش کے صدر سوربھ بھاردواج اور پارٹی کے دیگر رہنماؤں نے اتوار کو مدراسی کیمپ کے جھگی باشندوں سے ملاقات کی، ان کے دکھ درد کو سنا اور ان کے حقوق کی لڑائی سڑک سے لے کر ایوان تک لڑنے کا وعدہ کیا۔ جھگیوں کو بچانے کے لیے سنجے سنگھ نے وزیراعظم کو خط بھی لکھا ہے ۔ سنجے سنگھ نے کہا کہ مودی جی نے وعدہ کیا تھا جہاں جھگی، وہاں مکان۔ جھگی والوں کو کارڈ دیے گئے، لیکن اب بی جے پی حکومت انہی جھگیوں کو مسمار کر رہی ہے۔ آپ پارٹی ان غریبوں کے ساتھ کھڑی ہے۔ جھگی والوں کو بی جے پی کے خلاف متحد ہونا ہوگا۔مودی جی جب بہار میں ریلی کریں گے، اُسی دن آپ پٹنہ میں بی جے پی کے خلاف مظاہرہ کرے گی۔ دہلی سے بی جے پی بہار اور یوپی کے لوگوں کو نکال رہی ہے، بہار کی عوام بی جے پی کو بہار سے نکالے گی۔ سنجے سنگھ کا بیان:سنجے سنگھ نے کہا کہ ہم ہفتے کو وزیرپور گئے تھے، وہاں دیکھا کہ یوپی، بہار اور پوروانچل کے لوگوں کے گھر بی جے پی کے بلڈوزر نے تباہ کر دیے ہیں۔ یہی حال مدراسی کیمپ کا ہے۔ یہ وہ غریب لوگ ہیں جو مدراس سے لے کر بہار تک سے آکر دہلی میں مزدوری کرتے ہیں، ریڑھی لگاتے ہیں۔ بی جے پی ان غریبوں کو ختم کرنا چاہتی ہے۔
مدراسی کیمپ میں پچھلے 50 سالوں سے لوگ رہ رہے ہیں، لیکن بی جے پی نے پوری بستی کو بلڈوزر سے مسمار کر دیا۔ مودی جی نے جہاں جھگی، وہاں مکان کا وعدہ کیا تھا، لیکن آج انہی گھروں کو توڑا جا رہا ہے۔ ہم مطالبہ کرتے ہیں کہ مدراسی کیمپ کے تمام باشندوں کو وہیں مکان دیا جائے اور جن کے گھر توڑے گئے ہیں انہیں معاوضہ دیا جائے۔
پارلیمنٹ میں اُٹھے گا جھگی کا مسئلہ:سنجے سنگھ نے کہا کہ 21 جولائی سے پارلیمنٹ کا اجلاس شروع ہو رہا ہے۔ آپ کے رکن پارلیمنٹ دیگر اپوزیشن جماعتوں کے ساتھ مل کر جھگی والوں کے حقوق کے لیے آواز بلند کریں گے۔ سوربھ بھاردواج، سنجیو جھا، اکھلیش پتی ترپاٹھی، پروین، ساریکا چودھری اور پوری عام آدمی پارٹی اس لڑائی میں جھگی والوں کے ساتھ ہے۔اروند کیجریوال نے پہلے ہی کہا تھا کہ اگر بی جے پی اقتدار میں آئی، تو جھگیاں توڑ دی جائیں گی، اور آج وہی ہو رہا ہے۔ بلڈوزر اور کرپشن کے ذریعے زمینیں سرمایہ داروں کو دی جا رہی ہیں:سنجے سنگھ نے کہا کہ بی جے پی نے غریبوں کے مندر، گھر اور روزگار سب تباہ کر دیے۔ یہ سب کچھ کروڑوں کی رشوت، کرپشن اور سودے بازی کے تحت بڑی کمپنیوں اور سرمایہ داروں کو زمین دینے کے لیے کیا جا رہا ہے۔بہار میں بھی ہوگا حساب:سنجے سنگھ نے کہا کہ ہم پٹنہ میں بھی دھرنا دیں گے اور یہی نعرہ دیں گے کہ جنہوں نے دہلی سے بہاریوں کو نکالا ہے، بہار سے بہاری بی جے پی کو نکالیں گے۔سوربھ بھاردواج کا بیان:جب سے دہلی میں بی جے پی کی حکومت آئی ہے، روزانہ کہیں نہ کہیں بلڈوزر کی خبر آتی ہے۔ وزیرپور اور مدراسی کیمپ جیسے پرانے کیمپوں کو تباہ کیا جا رہا ہے۔مدراسی کیمپ 70 سال پرانا ہے، لیکن بی جے پی نے ان لوگوں کو نہایت بے رحمی سے بے گھر کر دیا۔ انتخاب سے پہلے جھگی والوں کو کارڈ دے کر وعدے کیے گئے، لیکن جیت کے بعد کوئی لیڈر واپس نہیں آیا۔انہوں نے کہا کہ جب جھگیاں گرائی گئیں تو پانی کی بھی سہولت نہیں تھی۔ صرف آپ پارٹی ہی ان غریبوں کے ساتھ کھڑی ہے۔ ایکس ( ٹوئٹر) پر بیان: سوربھ بھاردواج نے لکھا کہ آپ پارٹی جھگی والوں کے حق کی لڑائی سڑک سے لے کر ایوان تک لڑے گی۔ بی جے پی نے جہاں جھگی، وہاں مکان کا وعدہ کر کے بلڈوزر چلا دیا اور سینکڑوں خاندانوں کو برباد کر دیا۔ آج ہم نے راجیہ سبھا رکن سنجے سنگھ کے ساتھ جھگی والوں سے ملاقات کی اور ان کے ساتھ کھڑے ہونے کا وعدہ کیا۔
مودی جی بہار میں انتخابی ریلی کرنے جا رہے ہیں، اُسی دن آپ پٹنہ میں بی جے پی کے خلاف مظاہرہ کرے گی: سنجے سنگھ
