ڈاکٹر راحت اندوری کی یاد میں آل انڈیا مشاعرہ، دہلی میں گونجی راحت اندوری کی شاعری
نئی دہلی۔ اردو ادب کے آفتاب، عوام کے محبوب شاعر ڈاکٹر راحت اندوری کی یاد میں راجدھانی دہلی کے سُربھی اسٹوڈیو، نانگلئی میں ایک شاندار آل انڈیا مشاعرے کا انعقاد کیا گیا۔ یہ مشاعرہ جنتا کی کھوج میڈیا گروپ، نوئیڈا اور اردو ہندی ایکتا انجمن کے مشترکہ اہتمام سے ہوا، جس میں دہلی این سی آر سمیت ملک بھر سے نامور شعراء نے شرکت کر کے راحت صاحب کو خراجِ عقیدت پیش کیا۔
اس مشاعرے کے کنوینر نوجوان شاعر اثر دہلوی اثر رہے، جبکہ نظامت اور انضمام کی ذمہ داری اردو ہندی ایکتا انجمن کے صدر اسلم بےتاب نے نہایت خوبصورت انداز میں نبھائی۔ مشاعرے کی صدارت استاد شاعر خمار دہلوی نے فرمائی۔
اس موقع پر مہمانِ خصوصی صوفی کشش وارثی اور مہمانِ ذی وقار کرشنا شرما دامنی تشریف لائیں۔ اس کے علاوہ کرنل سنجے چترویدی، ساہتیہ چنچل سادھک، سرفراز دہلوی، احترام صدیقی، زبیر احمد اور دیگر ادب نواز شخصیات نے شرکت کی۔
اسلم بےتاب نے کہا کہ "راحت صاحب نے ہمیشہ حق کی بات کی، وہ گنگا جمنی تہذیب کی مثال تھے۔ نئی نسل کو ان کی بے باک شاعری سے جوڑنے کے لیے یہ مشاعرہ رکھا گیا ہے۔”
مشاعرے میں عارف دہلوی، ہاشم دہلوی، وفا اعظمی، انور غازی آبادی، پدم پرتیک، راجیو تنہجہ، شادان حسن، شفیق سیفی، سنجے کمار گری، فرقان انصاری، نورالزماں نور، گوپال گپتا، سریش چندرا، سید بابر، گولڈی غضب، پون کمار تومر، رنجن شرما اور شاعرات میں کرن سنگھ، گایتری کھنڈیلوال، انیکا ایم، پونم ساگر، سنجو تنہجہ، خوشی جسوال، ادیبہ ناز نے اپنا کلام پیش کیا اور خوب داد سمیٹی۔
دیر رات تک سامعین کا ہجوم بنا رہا۔ آخر میں اسلم بےتاب اور اثر دہلوی اثر نے تمام مہمانوں اور سامعین کا شکریہ ادا کیا۔
