قومی اردو کونسل کے زیر اہتمام عالمی کتاب میلے میں معاصر ادبی صحافت کے عنوان سے مذاکرے کا انعقاد

نئی دہلی: قومی اردو کونسل کے زیر اہتمام عالمی کتاب میلے میں معاصر ادبی صحافت کے عنوان سے مذاکرے کا انعقاد ہوا۔ یہ پروگرام قومی اردو کونسل کے اسٹال پر منعقد کیا گیا جس میں نئی نسل کے قلم کار ڈاکٹر خان محمد رضوان، ڈاکٹر محمد ریحان اور ڈاکٹر شاہد حبیب فلاحی نے بطور مہمان شرکت کی اور ادبی صحافت کے تعلق سے اپنے خیالات کا اظہار کرتے ہوئے موجودہ حالات میں اسے درپیش چیلنجز اور امکانات پر بھی روشنی ڈالی۔ اس پروگرام کی صدارت پروفیسر محمد کاظم شعبۂ اردو دہلی یونیورسٹی نے کی۔ آپ نے اپنے صدارتی خطاب میں کہا کہ قومی اردو کونسل کے ڈائریکٹر قابل مبارکباد ہیں کہ انھوں نے نوجوانوں کو تبادلۂ خیال کے لیے اتنا اہم پلیٹ فارم مہیا کیا۔ انھوں نے مذاکرے میں شریک مہمانوں کو بھی مبارک باد پیش کی۔ پروفیسر کاظم نے کہا کہ ٹیکنالوجی کے زمانے میں ہمیں زیادہ ذمے دار ہونے کی ضرورت ہے، آج کا مسئلہ یہ ہے کہ جو پیش کر رہے ہیں وہ اور جو ایویلویٹ کر رہے ہیں وہ دونوں کی طرف سے غیر ذمے داری کا سامنا ہے۔ ادبی رسائل کی ادارت کے سلسلے میں انھوں نے کہا کہ رسالہ نکالنا کسی ایک شخص کے بس کی بات نہیں ہے، اس کے لیے ایک ٹیم کا ہونا ضروری ہے، زبان کا جاننا الگ ہے ادب کا جاننا الگ ہے اور ادارت کا جاننا الگ چیز ہے، اس لیے ایک معیاری ادبی رسالہ اسی صورت میں کامیابی کے ساتھ شائع ہوسکتا ہے جب ایک باصلاحیت ادارتی ٹیم اس پر اپنی محنت و استعداد خرچ کرے۔ اس پروگرام کی نظامت ڈاکٹر مسرت نے انجام دی۔