مولانا بدرالدین اجمل نو گاؤں لوک سبھا ضمنی انتخاب میں AIUDF کے امیدوار نامزد
گوہاٹی، 15 ستمبر: آل انڈیا یونائیٹڈ ڈیموکریٹک فرنٹ (AIUDF) کی کور کمیٹی نے پارٹی کے صدر اور سابق رکن پارلیمان مولانا بدرالدین اجمل کو آسام کے 9-نوگاؤں پارلیمانی حلقے میں ہونے والے آئندہ لوک سبھا ضمنی انتخاب کے لیے پارٹی کا امیدوار نامزد کیا ہے۔
پارٹی کی جانب سے جاری کردہ باضابطہ پریس ریلیز کے مطابق AIUDF کی کور کمیٹی نے مولانا بدرالدین اجمل کی امیدواری کو منظوری دے دی ہے۔ یہ اعلامیہ پارٹی کے جنرل سکریٹری (انتظامیہ) اور سابق رکن اسمبلی حافظ بشیر احمد کے دستخط سے 15 ستمبر 2026 کو جاری کیا گیا ہے۔
نوگاؤں لوک سبھا کی یہ نشست سابق کانگریسی رکن پارلیمان پردیوت بوردولوئی کے استعفے کے بعد خالی ہوئی ہے۔ پردیوت بوردولوئی نے کانگریس سے علیحدگی اختیار کرکے بھارتیہ جنتا پارٹی (بی جے پی) میں شمولیت اختیار کی اور بعد ازاں آسام اسمبلی کے حلقۂ ڈسپور سے کامیابی حاصل کی، جس کے نتیجے میں نوگاؤں لوک سبھا نشست پر ضمنی انتخاب کی نوبت آئی ہے۔
مولانا بدرالدین اجمل آسام کی سیاست کی ایک معروف شخصیت، AIUDF کے صدر اور فی الحال بنّاکانڈی حلقے سے رکن اسمبلی ہیں۔ وہ اس سے قبل دھوبڑی لوک سبھا حلقے کی مسلسل تین مرتبہ نمائندگی کر چکے ہیں۔ ان کی نامزدگی کے بعد نو گاؤں لوک سبھا ضمنی انتخاب میں مقابلہ مزید اہم اور دلچسپ ہو گیا ہے۔
نو گاؤں لوک سبھا حلقے کے لیے پولنگ 6 اکتوبر 2026 کو ہوگی، جب کہ ووٹوں کی گنتی 9 اکتوبر 2026 کو مقرر ہے۔ اس انتخاب میں بی جے پی، کانگریس، AIUDF اور دیگر جماعتوں کے امیدوار میدان میں ہیں، جس کے باعث حلقے میں سیاسی سرگرمیوں میں تیزی آنے کی توقع کی جا رہی ہے۔
مولانا بدرالدین اجمل کی امیدواری کا اعلان، نامزدگی داخل کرنے کی آخری تاریخ سے ایک روز قبل کیا گیا ہے۔ AIUDF کی کور کمیٹی کے فیصلے کے بعد پارٹی نے نو گاؤں کے ضمنی انتخاب میں اپنے صدر کو براہِ راست میدان میں اتارنے کا فیصلہ کیا ہے۔ پارٹی نے عوام سے اپنے حق رائے دہی کے درست استعمال اور AIUDF کی کامیابی کے لیے دعا کی اپیل کی ہے۔
