نئی دہلی، 8 اکتوبر: یونانی ڈرگس مینوفیکچررز ایسوسی ایشن (یو ڈی ایم اے) کے زیر اہتمام 9واں یو ڈی ایم اے ڈے 2026ء 10 اور 11 اکتوبر کو جامعہ ملیہ اسلامیہ، نئی دہلی میں منعقد ہوگا۔ دو روزہ قومی پروگرام میں یونانی طب، ادویہ سازی، تحقیق، تعلیم اور صحت کے شعبوں سے وابستہ ماہرین، معالجین، محققین، اساتذہ، طلبہ اور صنعت سے وابستہ نمائندے شرکت کریں گے۔ اس سال پروگرام کا مرکزی موضوع ’’صحت مند مستقبل کے لیے یونانی ورثے کا فروغ‘‘ رکھا گیا ہے۔ پروگرام کا مقصد یونانی نظامِ طب اور یونانی ادویہ سازی کی صنعت کو مزید مستحکم کرنا، معیاری ادویات کی تیاری، سائنسی تحقیق و ترقی، جدت طرازی اور صنعت، تحقیقی اداروں اور تعلیمی مراکز کے درمیان باہمی تعاون کو فروغ دینا ہے۔ مسلم مجلسِ مشاورت میں میڈیا سے خصوصی ملاقات 9ویں یو ڈی ایم اے ڈے کے سلسلے میں مسلم مجلسِ مشاورت، اوکھلا، نئی دہلی میں میڈیا سے خصوصی ملاقات اور پریس میٹ کا انعقاد کیا گیا، جس میں یونانی طب اور یونانی ادویہ سازی کی صنعت سے متعلق مختلف اہم امور پر تبادلۂ خیال کیا گیا۔ اس موقع پر میڈیا نمائندگان کو 9ویں یو ڈی ایم اے ڈے کے مقاصد، پروگرام اور مختلف سرگرمیوں کے بارے میں تفصیلی معلومات فراہم کی گئیں۔ پریس میٹ میں محسن دہلوی، منیر عظمت، محمد جلیس، خبیب باقائی اور عزیر باقائی موجود تھے۔
یونانی طب کے مستقبل پر ہوگا تفصیلی غور دو روزہ پروگرام کے دوران یونانی ادویہ سازی کی صنعت کو درپیش مسائل، ضابطہ جاتی امور، معیاری ادویات کی تیاری، تحقیق و ترقی، جدت طرازی اور مستقبل میں یونانی طب کے امکانات پر ماہرین کی جانب سے تفصیلی گفتگو کی جائے گی۔ پروگرام میں سائنسی اجلاس، مسلسل یونانی طبی تعلیم (CUME)، تحقیقی مقالوں اور پوسٹروں کی پیشکش، آیوش ہیلتھ میلہ، یونانی، آیورویدک اور جڑی بوٹیوں سے تیار کردہ مصنوعات کی نمائش، مختلف اسٹالز اور عوامی بیداری سے متعلق سرگرمیاں شامل ہوں گی۔
آیوش ہیلتھ میلہ خصوصی توجہ کا مرکز 9ویں یو ڈی ایم اے ڈے کی ایک اہم سرگرمی آیوش ہیلتھ میلہ ہوگا، جس میں یو ڈی ایم اے سے وابستہ 50 سے زائد ادویہ ساز کمپنیاں اپنے اسٹالز قائم کریں گی اور اپنی یونانی، آیورویدک اور ہربل مصنوعات پیش کریں گی۔ ہیلتھ میلے میں عام لوگوں کو مختلف مصنوعات کے بارے میں براہِ راست معلومات حاصل کرنے کے ساتھ شریک کمپنیوں کی جانب سے فراہم کردہ خصوصی رعایتوں سے فائدہ اٹھانے کا موقع بھی ملے گا۔ میلے میں ایجنسیوں اور تقسیم کاروں کے لیے بھی خصوصی مواقع فراہم کیے جائیں گے، جہاں وہ ادویہ ساز کمپنیوں کے مالکان اور اعلیٰ نمائندگان سے براہِ راست ملاقات کرکے کاروباری امکانات، تقسیم کاری اور تجارتی اسکیموں کے بارے میں معلومات حاصل کرسکیں گے۔ ڈاکٹروں اور دیگر طبی ماہرین کو بھی شریک کمپنیوں کے نمائندگان سے تبادلۂ خیال، مصنوعات کے بارے میں معلومات اور نمونے حاصل کرنے کا موقع فراہم کیا جائے گا۔
منتظمین کے مطابق آیوش ہیلتھ میلہ ادویہ ساز کمپنیوں، ڈاکٹروں، طبی ماہرین، تقسیم کاروں، ایجنسیوں اور عام عوام کے درمیان رابطے کا ایک مؤثر ذریعہ ثابت ہوگا اور یونانی و آیوش مصنوعات کے فروغ اور عوامی آگاہی میں اہم کردار ادا کرے گا۔
ڈاکٹر لکشمی کانت باجپائی ہوں گے مہمانِ خصوصی
9ویں یو ڈی ایم اے ڈے کی افتتاحی تقریب میں ڈاکٹر لکشمی کانت باجپائی، معزز رکن پارلیمنٹ، راجیہ سبھا مہمانِ خصوصی ہوں گے۔
اس موقع پر کنور باسط علی، قومی صدر، اقلیتی شعبہ، بھارتیہ جنتا پارٹی؛ ڈاکٹر این۔ ظہیر احمد، ڈائریکٹر جنرل، مرکزی کونسل برائے تحقیق برائے طبِ یونانی (CCRUM)، نئی دہلی؛ ڈاکٹر ڈی۔ سی۔ کاٹوچ، سابق مشیر (آیوروید)، وزارتِ آیوش، حکومتِ ہند؛ اور ڈاکٹر یوگیتا منجال، ڈائریکٹر، ڈائریکٹوریٹ آف آیوش، حکومتِ دہلی معزز مہمانوں کی حیثیت سے شرکت کریں گے۔
