ڈاکٹر سید معراج ربانی مدنی: باطل کیخلاف حق کی آواز

ڈاکٹر سید معراج ربانی مدنی حفظہ اللہ تعالیٰ عالم اسلام کے ایک نہایت باہمت، جرئتمند اور حق پرست عالم دین ہیں جو اہل حدیث مکتب فکر سے وابستہ ہیں۔ وہ قرآن و سنت کی روشنی میں شرک، بدعات، اور باطل عقائد کے خلاف کھل کر آواز اٹھاتے ہیں۔ ان کی تقریریں، خطبات اور تحریریں ہزاروں لوگوں کیلئے ہدایت کا ذریعہ بن چکی ہیں۔ ان کا مشن "باطل کے خلاف للکار” ہے، جو جہالت، بدعات اور شرک کی بنیادوں کو چیلنج کرتے ہوئے امت کو قرآنی حقائق اور احادیث صحیحہ کی روشنی کی طرف راغب کرنے کی ایک عظیم جدوجہد ہے۔ ڈاکٹر معراج ربانی مدنی کی شخصیت اور ان کے پیغام نے نہ صرف بھارت بلکہ عالم اسلام کے کونے کونے میں لوگوں کے دلوں کو متاثر کیا ہے۔ ان کی عالمی شہرت اور مقبولیت ان کے اخلاص، محنت اور حق کیلئے بے باک آواز کی مرہون منت ہے۔
ڈاکٹر سید معراج ربانی مدنی سے میری پہلی ملاقات پاکوڑ میں آل انڈیا اہل حدیث کانفرنس کے موقع پر ہوئی۔ اس ملاقات میں شیخ معراج ربانی کی تقریر نے مجھ پر گہرا اثر چھوڑا۔ برسوں تک سوشل میڈیا اور ٹیلی فون کے ذریعے رابطے میں رہنے کے بعد، حال ہی میں ایک سفر کے دوران دوبارہ ملاقات ہوئی۔ اس ملاقات میں ڈاکٹر معراج ربانی نے اپنی اعلیٰ ظرفی کا مظاہرہ کیا، گرمجوشی سے گلے لگایا، حال احوال دریافت کیا، اور والد گرامی شیخ مولانا عزیز الرحمن سلفی کے بارے میں خیریت دریافت کی۔ انہوں نے بغیر چائے نوشی کے جانے کی اجازت نہ دی، جو ان کی سادگی اور مہمان نوازی کی عکاسی کرتا ہے۔ ان کے حوصلہ افزا الفاظ نے میرے قلب و جگر کو تقویت بخشا۔ یہ واقعہ ڈاکٹر معراج ربانی کی شخصیت کی سادگی، خلوص اور لوگوں سے گہرے رابطے کی ایک جھلک پیش کرتا ہے۔
ڈاکٹر معراج ربانی کا پیغام واضح ہے، شرک، بدعات اور باطل عقائد کے خلاف کھڑے ہونا اور لوگوں کو توحید کی طرف بلانا۔ ان کی تقریروں میں حزب پرستی، اخوان المسلمین جیسے گروہوں کی تنقید، اور اسلامی تعلیمات کی خالصیت پر زور دیا جاتا ہے۔ وہ اہل حدیث مکتب فکر کے پرچم بردار ہی نہیں بلکہ شیخ معراج ربانی نے اہل بدعت سے اہل توحید کی طرف سخت ترین امتحان آزمائش سے سفر کیا ہے ، شیخ معراج ربانی اپنے خطبات میں قرآن و حدیث کو بنیاد بناتے ہیں۔ ان کا مشن صرف تنقید تک محدود نہیں، بلکہ وہ لوگوں کو عملی طور پر ہدایت کی طرف لے جانے کی کوشش کرتے ہیں۔ شیخ معراج ربانی کے بیانات دلائل سے مزین اور قرآن و احادیث کے تناظر میں ہوتے ہیں، ان کی محنت و لگن سے ہزاروں افراد نے بدعات سے توبہ کرکے توحید کا راستہ اختیار کیا ہے۔
ڈاکٹر معراج ربانی کی تقریریں نہ صرف بھارت بلکہ پوری دنیا میں سنی جاتی ہیں۔ ان کے خطبات اور سوال و جواب کے اجلاسات خاص طور پر کم پڑھے لکھے طبقات، جیسے کہ مزدوروں اور عام لوگوں کے لیے، ہدایت کا ذریعہ بنتے ہیں۔ شیخ معراج ربانی مدنی نے کئی ممالک میں جہاں کم پڑھے لکھے اور دین سے دور رہنے والے غریب مزدور کام کرتے ہیں، اپنے خطبات اور اجلاسات منعقد کیے، جن سے لاکھوں کروڑوں افراد نے استفادہ کیا۔ ان کی تقاریر اور تالیفات کے تراجم دنیا بھر میں لوگوں تک پہنچ رہے ہیں، جو ان کے پیغام کی عالمگیر اپیل کی گواہی دیتے ہیں۔ ایک مثال محمد اکرم کی ہے، جو اترپردیش کے اعظم گڑھ سے تعلق رکھتے ہیں۔ انہوں نے بتایا کہ انہوں نے ڈاکٹر معراج ربانی کو کیسٹس کے دور میں سنا اور ان کے خطبات کے مجموعے سن کر توحید کے راستے پر گامزن ہوئے۔ آج وہ اپنے حلقے میں ایک بااثر مصلح اور داعی کے طور پر جانے جاتے ہیں، جن کے زیر سایہ کئی ادارے چل رہے ہیں۔ یہ واقعہ ڈاکٹر معراج ربانی کے پیغام کے گہرے اثرات کی ایک واضح مثال ہے۔ڈاکٹر معراج ربانی نے جدید ٹیکنالوجی کا بھرپور استعمال کیا ہے۔ ان کی تقریریں یوٹیوب، فیس بک اور دیگر سوشل میڈیا پلیٹ فارمز پر بڑے پیمانے پر دیکھی اور سنی جاتی ہیں۔ ان کے لیکچرز جیسے کہ قرآن کا دشمن، شرک کی بنیاد، بدبخت بدعتی، مصائب کیوں آتی ہیں؟ اور نیا سال اور اسلام ہزاروں لوگوں کے لیے ہدایت کا ذریعہ بن چکے ہیں۔ ان کے خطبات کی ویڈیوز اور آڈیوز نہ صرف دینی طلبہ بلکہ عام لوگوں کے لیے بھی قابل فہم اور پرکشش ہیں۔
ڈاکٹر معراج ربانی مدنی کی شخصیت کا ایک اہم پہلو ان کی سادگی، خلوص اور لوگوں سے گہرا تعلق ہے۔ شیخ معراج ربانی نہ صرف ایک عالم دین ہیں بلکہ ایک ایسی شخصیت ہیں جو لوگوں کے دلوں کو چھوتی ہے۔ ان کی مہمان نوازی، حوصلہ افزا الفاظ اور دوسروں کے لیے فکر انہیں ایک مثالی رہنما بناتی ہے۔ ان کی جدوجہد اور محنت سے ہزاروں لوگوں نے نہ صرف دینی شعور حاصل کیا بلکہ عملی زندگی میں بھی انقلابی تبدیلی لائی۔ ڈاکٹر سید معراج ربانی مدنی کے لیے اللہ سے دعا کرتے ہیں کہ اللہ تعالیٰ انہیں صحت کاملہ، تندرستی اور لمبی عمر عطا فرمائے تاکہ امت مسلمہ اور عالم اسلام ان سے تادیر استفادہ کرتا رہے۔ ہم آپ کے لیے نیک خواہشات کا اظہار کرتے ہیں اور دعا گو ہیں کہ ان کا پیغام مزید لوگوں تک پہنچے۔ڈاکٹر سید معراج ربانی مدنی ایک ایسی شخصیت ہیں جو باطل کے خلاف حق کی آواز بن کر ابھرے ہیں۔ آپ کی محنت، لگن اور اخلاص نے ہزاروں لوگوں کو توحید کے راستے پر گامزن کیا ہے۔ شیخ معراج ربانی نہ صرف ایک عالم دین ہیں بلکہ ایک مصلح، داعی اور رہنما بھی ہیں جو اپنی سادگی، جرئت اور خلوص کے ساتھ لوگوں کے دلوں میں گھر کرتے ہیں۔ ان کا پیغام آج کے دور میں جہالت اور بدعات کے خلاف ایک روشن مینار ہے، جو آنے والی نسلوں کے لیے بھی مشعل راہ ثابت ہو گا۔ اللہ تعالیٰ ان کی کوششوں کو قبول فرمائے اور انہیں امت کے لیے مزید خدمت کی توفیق عطا کرے۔ آمین۔