Articles مضامین

یو پی کو مسلمان وزیر اعلیٰ نہیں، سیکولر وزیر اعلیٰ چاہیے

یو پی کو مسلمان وزیر اعلیٰ نہیں، سیکولر وزیر اعلیٰ چاہیے

ڈاکٹر عبد اللہ فیصل

آج کل کچھ لوگ یہ نعرہ لگا رہے ہیں کہ اتر پردیش کا وزیر اعلیٰ مسلمان ہونا چاہیے۔
میں اس بات کی سختی سے تردید کرتا ہوں یہ نعرہ مسلمانوں کا ہمدردی والا نعرہ نہیں ہے، یہ مسلمانوں کو برباد کرنے والا نعرہ ہے
اتر پردیش کو مسلمان وزیر اعلیٰ کی ضرورت نہیں ہے۔ اتر پردیش کو ایک سیکولر، ایماندار، اچھے انسان کی ضرورت ہے۔
ہندو مسلمان کی بات ہی کیوں؟
ہندوستان سیکولر ملک ہے۔ ہمارا آئین کہتا ہے کہ وزیر اعلیٰ ہندو ہو یا مسلمان، یہ نہیں دیکھا جائے گا۔ یہ دیکھا جائے گا کہ وہ انصاف کرنے والا ہے یا نہیں، ایماندار ہے یا نہیں، سب کو ساتھ لے کر چلنے والا ہے یا نہیں۔

جب ہم کہتے ہیں کہ وزیر اعلیٰ مسلمان ہونا چاہیے، تو ہم خود ہی بی جے پی کی زبان بول رہے ہیں۔ بی جے پی بھی تو یہی کہتی ہے کہ ہندو وزیر اعلیٰ ہونا چاہیے، مسلمان وزیر اعلیٰ ہونا چاہیے۔ فرق کیا رہ گیا؟
ہم کو ہندو مسلم کی سیاست سے باہر نکلنا ہوگا۔ ہمیں ایک ایسے آدمی کی ضرورت ہے جو ہندو کے لیے بھی اتنا ہی انصاف کرے جتنا مسلمان کے لیے کرے۔ جو دلت کے لیے بھی اتنا ہی بولے جتنا براہمن کے لیے بولے۔ جو مندر کو بھی محفوظ رکھے اور مسجد کو بھی محفوظ رکھے۔
یہی سیکولرزم ہے۔ یہی بابا صاحب امبیڈکر کا آئین ہے۔ یہی گاندھی اور مولانا آزاد کا ہندوستان ہے۔
مسلمان وزیر اعلیٰ بننے سے مسلمانوں کا کیا فائدہ ہوگا؟

ذرا سوچیے، اگر کوئی مسلمان وزیر اعلیٰ بن بھی جائے اور وہ ظالم ہو، کرپٹ ہو، غنڈوں کا ساتھی ہو، تو کیا مسلمانوں کا بھلا ہو جائے گا؟
نہیں۔ تاریخ گواہ ہے، کئی مسلمان وزیر اعلیٰ، مسلمان ایم پی، مسلمان ایم ایل اے بنے، لیکن مسلمانوں کی حالت وہی رہی۔ اس لیے کہ لیڈر کا مسلمان ہونا کافی نہیں ہے، لیڈر کا اچھا ہونا ضروری ہے۔
ہمیں نام کا مسلمان نہیں چاہیے، ہمیں کام کا انسان چاہیے۔

ہمیں ایسا وزیر اعلیٰ چاہیے جوکسی بے گناہ کو جیل میں نہ ڈالے، چاہے وہ ہندو ہو یا مسلمان- کسی کا گھر بلڈوزر سے نہ گرائے، چاہے وہ ہندو ہو یا مسلمان نوکری میں مذہب نہ دیکھے، قابلیت دیکھے- اسکول میں بچے کا مذہب نہ دیکھے، اس کی تعلیم دیکھے- تھانے میں انصاف کرے، پیسہ نہ دیکھے

اگر ایک ہندو وزیر اعلیٰ یہ سب کرتا ہے، تو وہ ہمارے لیے لاکھ مسلمان نام والے لیڈروں سے بہتر ہے۔ اور اگر ایک مسلمان وزیر اعلیٰ یہ سب نہیں کرتا، تو وہ ہمارے لیے کسی کام کا نہیں ہے۔
یہ نعرہ بی جے پی کو فائدہ پہنچاتا ہے
یہ بات سمجھنی ہوگی کہ "مسلمان وزیر اعلیٰ” والا نعرہ کس کو فائدہ پہنچاتا ہے؟
جب ہم یہ نعرہ لگاتے ہیں تو بی جے پی کو موقع مل جاتا ہے کہ وہ ہندوؤں کو ڈرائے۔ وہ کہتی ہے دیکھو مسلمان اپنا وزیر اعلیٰ بنانا چاہتے ہیں، ہندو خطرے میں ہے، سب ہندو ایک ہو جاؤ۔
نتیجہ کیا ہوتا ہے؟ ہندو ووٹ ایک ہو جاتا ہے، مسلمان ووٹ بٹ جاتا ہے، اور فائدہ سیدھا بی جے پی کو ہوتا ہے۔
ہمیں اس جال میں نہیں پھنسنا ہے۔ ہمیں یہ کہنا ہے کہ ہمیں ہندو وزیر اعلیٰ سے بھی نفرت نہیں ہے، ہمیں مسلمان وزیر اعلیٰ کی ضد بھی نہیں ہے۔ ہمیں صرف سیکولر وزیر اعلیٰ چاہیے۔
جو آدمی آئین پر چلے گا، وہی ہمارا وزیر اعلیٰ ہے، چاہے وہ کسی بھی مذہب کا ہو۔
اسلام کیا کہتا ہے؟
اسلام بھی یہی کہتا ہے۔ قرآن میں اللہ نے نہیں کہا کہ حاکم مسلمان ہونا چاہیے۔ اللہ نے کہا:
> اِنَّ اللّٰهَ يَاْمُرُكُمْ اَنْ تُؤَدُّوا الْاَمَانَاتِ اِلٰٓى اَهْلِهَا وَاِذَا حَكَمْتُمْ بَيْنَ النَّاسِ اَنْ تَحْكُمُوْا بِالْعَدْلِ
> اللہ تمہیں حکم دیتا ہے کہ امانتیں ان کے حقداروں کو دو، اور جب لوگوں کے درمیان فیصلہ کرو تو انصاف سے کرو۔
اسلام میں حاکم کی پہلی شرط مسلمان ہونا نہیں، عادل ہونا ہے، انصاف کرنے والا ہونا ہے۔
حضرت عمر رضی اللہ عنہ کے دور میں بھی غیر مسلموں کو بڑے بڑے عہدے دیے گئے تھے، کیونکہ وہ ایماندار تھے۔
اس لیے ہمیں مذہب کی بنیاد پر وزیر اعلیٰ نہیں مانگنا چاہیے، ہمیں انصاف کی بنیاد پر وزیر اعلیٰ مانگنا چاہیے۔
اے یو پی کے مسلمانو! اس غلط نعرے سے بچو۔
ہمیں مسلمان وزیر اعلیٰ نہیں چاہیے۔
ہمیں ہندو وزیر اعلیٰ سے بھی کوئی جھگڑا نہیں ہے۔
ہمیں سیکولر وزیر اعلیٰ چاہیے۔
ہمیں اچھا آدمی چاہیے۔
ہمیں ایماندار آدمی چاہیے۔
ہمیں انصاف کرنے والا آدمی چاہیے۔
جو آدمی سب کے لیے برابر ہوگا، وہی یو پی کو بچا سکتا ہے۔ جو آدمی صرف ایک قوم کا ہوگا، وہ یو پی کو توڑ دے گا۔
آؤ، ہم سب مل کر یہ آواز اٹھائیں یو پی کو مذہب کا وزیر اعلیٰ نہیں، انصاف کا وزیر اعلیٰ چاہیے۔

مضمون نگار: ماہنامہ المصباح ممبئ کے ایڈیٹر ہیں

Related posts

سات محرم الحرام، قطب الزمان سید علوی مولی الدویلہ ممبرمیؒ اور ہماری دینی و ملی ذمہ داریاں

Paigam Madre Watan

हालात से निराश होने की जरूरत नहीं

Paigam Madre Watan

 روٹی کے ٹکڑے کئے تو بیٹا بھی جاگ اٹھا !!

Paigam Madre Watan