حمد کس کی گنگنائیں رب ترے ہوتے ہوئے
کیوں کسی کے درپے جائیں رب ترے ہوتے ہوئے
تو ہے خالق، تو ہے رازق، تو ہے مالک بحر و بر
کیوں کسی سے لو لگائیں رب ترے ہوتے ہوئے
حکمِ رَبّی فَاعبُدُونی اُسْجُدُولی ہے سدا
کس کے در پہ سر جھکائیں رب ترے ہوتےہوئے
بے وسیلہ واسطہ سنتا ہے تو سب کی صدا
کس سے ہم مانگیں دعائیں رب ترے ہوتے ہوئے
غافرُ ذنبی ہے رحماں، قابلُ التوبہ ہے تو
کون بخشے گا خطائیں رب ترے ہوتے ہوئے
جنت الفردوس کا وارث بنا دے رَبّنا
ھاویہ میں کیسےجائیں رب ترے ہوتے ہوئے
آرزو میری، سفارش شافعِ محشر ملے
مُدَّعا کس کو سنائیں رب ترے ہوتے ہوئے
ہے فلاح و فوز کا خواہاں سعید، اَللّٰہ سے
کس کو ہم داتا بنائیں رب ترے ہوتے ہوئے
سعیدالرحمٰن عزیز سلفی
یہ مناجات 28 اپریل 2023 بروز جمعہ مکمل ہوئی۔
نظر ثانی: ابو البیان رفعت حفظہ اللہ
