تخلیق :مولانا عزیز الرحمن سلفی
ماخوذ:شعری مجموعہ پرواز(مطبوع)
۶؍اپریل ۲۰۰۳ء
اے خدائے ذی العلی، اے مالک کل کائنات
عظمتوں کی مستحق ہے صرف تیری ایک ذات
دست قدرت میںترے ارض وسماء ہر شش جہات
موت دیدے جس کو چاہے ، دے جسے چاہے حیات
ماہ و خور کی گردشیں ہوں یا نظام ابر و باد
حکمراں تو بحرو بر کا مالک یوم التناد
بندگی کرتے ہیں تیری روز و شب جن و ملک
تیری ہی تسبیح خواں ہے، بحر کی تہہ میں سمک
خاورِ مشرق ہو، یا مہتاب ہو، یا ہو فلک
عطر بیزی گل کی ہو، یا ہو پرندوں کی چہک
بندگی کرتا ہوا مومن جھکاتا ہے جبیں
ظالموں کے ماسوا سب کو ہے قدرت کا یقیں
اندرون خاک تو دانے کو دیتا زندگی
مُردگی کے بعد تو دھرتی کو دیتا زندگی
قطرۂ ناپاک کو پیٹوں میں دیتا زندگی
قبر کی تہ میں تنِ مردہ کو دیتا زندگی
اے خدا !بس تو ہی مالک ہے مری اس جان کا
تو اکیلا ہی محافظ ہے مرے ایمان کا
