’اے خدا رحم کر‘

تخلیق:مولانا عزیز الرحمن سلفی 

ماخوذ: شعری مجموعہ پرواز (مطبوع)

’اے خدا رحم کر‘
(۸؍دسمبر۱۹۷۷؁ء)

گھپ اندھیرا ہے اور راہ ملتی نہیں
کوئی شمع سر راہ جلتی نہیں
راھبر کوئی دھرتی اگلتی نہیں
کیسے پہنچوں کوئی بات بنتی نہیں

ہر طرف چور و ڈاکو کی آماج ہے
بے ایمانی کے سر ملک کا تاج ہے
جوش پر ظلم کا بحر موّاج ہے
شرک کی مملکت کفر کا راج ہے

نفس کا اپنے ہی پوجنا دھرم ہے
بات توحید کی بھی یہاں جرم ہے
چلنا اسلام پر باعثِ شرم ہے
مال دنیا کی خاطر ہر اک گرم ہے

گاؤں آباد مسجد تو سنسان ہے
اور الفت کی دنیا بھی ویران ہے
باطل وخیر میں جنگ گھمسان ہے
خواب غفلت میں مدہوش انسان ہے

کیسے آندھی میں شمع جلائے کوئی
کیسے طوفان میں گھر بنائے کوئی
کس طرح کارواں کو بچائے کوئی
یاں نہ آئے کوئی واں نہ جائے کوئی

بھیج دے غزنوی سا جو جرار ہو
رہنما کوئی جو مثل کرار ہو
ناخدائے سفینہ ہو بیدار ہو
جس کی ٹیپو سی باطل پہ یلغار ہو

جس کی باطل کے سینہ پہ تلوار ہو
دین کے واسطے اس کی ہر وار ہو
جس کی ہر بات میں مدھ بھرا پیار ہو
دین کی روشنی کا وہ مینار ہو

اے خدا رحم کھا، اے خدا رحم کر
گمرہی دور کر، گمرہی ختم کر
ہم پہ نار جہنم نہ تو گرم کر
ہم کو بھی شرم دے، آپ بھی شرم کر