مالیگاؤں (پریس ریلیز): شہر مالیگاؤں کی اولین انجینئرنگ انسٹیٹیوٹ مولانا مختار احمد ندوی ٹیکنیکل کیمپس (MMANTC) میں مختلف شعبہ جات میں ڈگری اور پالی ٹیکنیک انجینئرنگ کورسیز کامیابی سے جاری ہیں۔ کالج میں قائم ٹریننگ اینڈ پلیسمنٹ سیل کی بدولت ہر سال درجنوں طلبہ کو معروف نیشنل و ملٹی نیشنل کمپنیوں میں ملازمت کے مواقع حاصل ہو رہے ہیں۔ امسال بھی اس پلیسمنٹ سیل کی کوششوں سےپچاس فیصد سے زائد طلبہ کا مختلف کمپنیوں (بجاج، نوری سیس، آلائڈ ، اے ون ٹیک، کرن اکیڈمی، گیتے انفو ٹیک، سن انفرا ، پارش، الفا بوائلر اور دیگر ) میں انتخاب ہو چکا ہے۔ اس سلسلے میں شعبۂ الیکٹریکل انجینئرنگ کے فائنل ایئر کے دو ہونہار طلبہ پریم شندے اور پرافل دیسلے کا انتخاب تھانے شہر کی معروف کمپنی سن انفرا انرجیز میں ہوا ہے۔ کمپنی کی جانب سے دونوں طلبہ کو جوائننگ لیٹر بھی موصول ہو چکے ہیں۔طلبہ کے روزگار کو لیکر پروفیسر اسماعیل انصاری ( ٹریننگ اینڈ پلیسمنٹ آفیسر) ہمہ وقت کوشش کر رہے ہیں۔ اس کامیابی پر جامعہ محمدیہ ایجوکیشن سوسائٹی کے چیئرمین جناب ارشد مختار صاحب اور سیکریٹری جناب راشد مختار صاحب نے دلی مبارکباد پیش کی اور طلبہ کے روشن مستقبل کیلئے نیک تمناؤں کا اظہار کیا۔ کالج ہذاکے پرنسپل ڈاکٹر شاہ عقیل احمد اور پالی ٹیکنیک کے پرنسپل پروفیسر یعقوب انصاری نے بھی طلبہ کو مبارکباد دی۔ شعبہ الیکٹریکل انجینئرنگ کے سربراہ ڈاکٹر فہد اقبال نے اس کامیابی کو ادارے کی تعلیمی و تکنیکی معیار کا مظہر قرار دیا۔ اس موقع پر ڈاکٹر سلمان بیگ (ڈین اکیڈمکس)، ڈاکٹر نوید حسین (ڈین ریسرچ)، ڈاکٹر دلاور حسین (ڈین ایڈمیشن) سمیت جملہ اسٹاف نے طلبہ کی کامیابی پر خوشی کا اظہار کیا۔
کالج آف انجینئرنگ منصورہ: الیکٹریکل انجینئرنگ کے طلبہ کا معروف کمپنی سن انفرا انرجیز میں انتخاب
